Қазақстан мен Швейцария арасындағы әріптестік Іскерлік кеңес алаңында жаңа деңгейге көтерілді
2025 жылғы 28 қарашада Қазақстан-Швейцария Іскерлік кеңесінің 5-отырысы өтіп, оған екі елдің мемлекеттік органдарының басшылары, жетекші компаниялардың және іскерлік бірлестіктердің өкілдері қатысты. Іс-шараға Қазақстанның Сыртқы сауда палатасы (ҚССП) да қатысты.
Отырыс делегациялар басшыларының сөздерімен басталды. Олардың қатарында Қазақстан Республикасының Премьер-Министрінің орынбасары - Ұлттық экономика министрі Серік Жұманғарин, Швейцария Конфедерациясының Вице-президенті Ги Пармелан және Кеңестің тең төрағалары Талғат Алдыбергенов пен Петер Шпулер болды.
Кеңес шеңберінде өнеркәсіп, көлік, машина жасау, денсаулық сақтау және ауыл шаруашылығы сияқты негізгі салалардағы ынтымақтастық перспективалары талқыланды. Сондай-ақ отырыс барысында қол қойылған құжаттармен алмасу рәсімі өтіп, бұл екі ел арасындағы институционалдық өзара әрекеттестіктің жоғары деңгейін айқындады.
Бағдарламаның маңызды бөлігі сауда-экономикалық ынтымақтастық мәселелеріне арналды. ҚССП Басқарма Төрағасы Мұрат Қарымсақов негізгі көрсеткіштерді атап өтіп, ынтымақтастықты одан әрі кеңейтудің жоғары әлеуетін растады. Ол өз сөзінде:
«Швейцария - Батыс Еуропадағы Қазақстанның стратегиялық серіктесі. Біздің елдеріміз арасында тұрақты жоғары деңгейдегі саяси байланыстар, белсенді парламентаралық диалог және екіжақты экономикалық қатынастардың орнықты дамуы қамтылған берік әріптестік қалыптасқан», - деп атап өтті.
Қазақстан мен Швейцария арасындағы сауда-экономикалық ынтымақтастық өсімнің тұрақты қарқынын көрсетуде. 2024 жылы тауар айналымы 26%-ға өсіп, 1,74 млрд АҚШ долларын құрады. 2025 жылдың алғашқы жартыжылдығында өзара сауда көлемі 623,2 млн АҚШ долларына жетті. 2005-2024 жылдар аралығындағы тікелей шетелдік инвестициялардың жиынтық көлемі 35,3 млрд АҚШ долларынан асты. Қазақстаннан экспорт негізінен энергоресурстар, бағалы тастар мен металдар, сондай-ақ алюминий, мыс және көмірден қалыптасады. Импортқа фармацевтика өнімдері, сағаттар, машина жасау және химия өнімдері, бағалы тастар, металдар және зергерлік бұйымдар кіреді.
Мұрат Қарымсақов сөзін жалғастыра отырып, Қазақстанда швейцариялық капиталдың қатысуымен жұмыс істейтін шамамен 300 заңды тұлға және 100-ден астам бірлескен кәсіпорын бар екенін атап өтті. Ол Қазақстанда көптеген жылдар бойы өнеркәсіптік, технологиялық және инвестициялық кооперацияны дамытып келе жатқан жетекші швейцариялық компанияларды атады. Олардың қатарында: Stadler Rail - теміржол жылжымалы құрамы өндірісіндегі әлемдік көшбасшы; Philip Morris International - Қазақстандағы алғашқы шетелдік инвестор; Glencore - «Kazzinc» компаниясының тең құрылтайшысы; фармацевтика саласындағы Roche және Novartis; сондай-ақ SGS, Syngenta, Swissgrow, INOKS Capital, Mabco Construction, Ammann Group, Clariant, Sika, Comlux, Eurasian Foods Corporation / Ursem Holding компаниялары бар.
Сонымен қатар, назар Қазақстан-Швейцария ынтымақтастығындағы ең серпінді бағыттардың бірі - агроөнеркәсіптік салаға аударылды. Швейцария капиталының қатысуымен жүзеге асырылып жатқан үш ірі жоба ерекше атап өтілді. Бірінші жоба - Қостанай облысындағы Eurasia Swiss Holding AG бастамасы, ол заманауи сүт фермаларын, зауыт және оқыту орталығын құруға шамамен 62 млн АҚШ доллары көлемінде инвестиция салуды көздейді.
Екінші жоба - Harvest Agro және Inoks Capital SA компанияларымен бірлесіп, Қызылорда облысында ауыл шаруашылығы дақылдарын 20 мың гектар алқапта өндіруді және 150-ден астам жұмыс орнын құруды қарастыратын агроөнеркәсіптік кластер құру. Үшінші бағыт - Harvest Kazakhstan компаниясының суару жүйелерін енгізу жобасы. Компания жеті өңірде 30 мың гектар жерді суармалы алқапқа айналдыруды жоспарлап отыр. Жалпы инвестиция көлемі 500 млн АҚШ долларын құрайды, нәтижесінде 1000-нан астам тұрақты жұмыс орындары ашылады.
Өсіп келе жатқан инвестициялық белсенділік аясында Қазақстанның Сыртқы сауда палатасы мен Швейцарияның Joint Chamber of Commerce ұйымы арасында Меморандумға қол қойылуы серіктестікті тереңдетудегі маңызды қадам болды. Бұл құжат Қазақстан және Швейцария іскер топтары арасындағы жүйелі және тұрақты диалогқа негіз қалайды, институционалдық байланысты нығайтады және ынтымақтастықты жаңа - мазмұнды, құрылымды және практикалық деңгейге көтереді.
Отырыс бағдарламасы B2B және B2G кездесулермен аяқталып, қатысушыларға коммерциялық және инвестициялық ынтымақтастықты кеңейту бойынша бұдан арғы қадамдарды талқылауға мүмкіндік берді.
Пікір қалдыру:
Пікірлер: