Қазақстан Үрімшіде өткен 3-ші Өңіраралық ынтымақтастық форумына қатысты
2024 жылдың 5 желтоқсанында Қытайдың Үрімші қаласында 3-ші Өңіраралық ынтымақтастық форумы және мемлекеттік құрылымдар басшыларының бірлескен кездесуі өтті. Іс-шараға «Атамекен» ҰКП Төралқа төрағасы Райымбек Баталов пен Қазақстанның Сыртқы сауда палатасының басқарма төрағасы Мұрат Қарымсақов қатысты. Форум Қазақстан, Шыңжаң-Ұйғыр автономиялық ауданы (ШҰАА) және Гонконгтың (Сянган) өкілдерін біріктіріп, экономикалық ынтымақтастықтың жаңа мүмкіндіктерін талқылайтын маңызды алаңға айналды.
Іс-шараға үш тараптың жоғары лауазымды тұлғалары, мемлекеттік органдар мен бизнес өкілдері қатысты. Форум Қазақстан мен Қытайдың, оның ішінде ШҰАА және Гонконгтың сауда, инвестициялар, инновациялар және туризм салаларындағы ынтымақтастығын тереңдетуге арналған маңызды қадам болды.
«Атамекен» ҰКП басшысы Райымбек Баталов өңірлер арасындағы диалог пен кооперацияның маңыздылығын атап өтіп, бұл ынтымақтастықтың ортақ мақсатқа – тұрақты және өзара тиімді экономикалық дамуға жетуге көмектесетінін айтты.
Форум Қазақстан, ШҰАА және Гонконг делегацияларының серіктестікті нығайтуға жоғары қызығушылығын көрсетті. Қазақстан мен ШҰАА арасындағы сауда көлемі өткен жылы 20 миллиард долларға жетті, бұл Қытаймен жалпы тауар айналымының жартысына тең. Мұндай іс-шаралар Қазақстанның Сыртқы сауда палатасының халықаралық ынтымақтастықты дамыту және шетелдік инвестицияларды тарту стратегиясының маңызды бөлігі болып табылады.
.jpeg)
Форум спикерлерінің алғашқысы ретінде сөз алған Сыртқы сауда палатасының басшысы Мұрат Қарымсақов Қазақстан мен Қытай арасындағы өзара сенім мен құрметке негізделген ұзақ жылдарға созылған тиімді ынтымақтастық тарихын атап өтті.
«Сыртқы сауда палатасы жаңартылатын энергия, көлік және логистика, электронды коммерция, туризм, ауыл шаруашылығы және өнеркәсіп сияқты басым салаларға ерекше назар аударады. 2023 жылы Қазақстан мен Қытай арасындағы тауар айналымы 31,48 миллиард долларға жетіп, өткен жылмен салыстырғанда 30%-ға артты. 2024 жылдың алғашқы тоқсанында бұл көрсеткіш 6,27 миллиард долларды құрады», – деді ол.
Мұрат Қарымсақов Сыртқы сауда палатасының жұмысы туралы айтып, 2023 жылдан 2024 жылдың 10 айына дейін Палата 6,5 мыңнан астам қазақстандық және шетелдік компаниялардың қатысуымен 230-дан астам бизнес іс-шараны ұйымдастырғанын және қатысқанын атап өтті. Нәтижесінде, жалпы сомасы 2,2 миллиард долларға меморандумдар, экспорттық-импорттық келісімшарттар және инвестициялық келісімдер жасалды.
1. Жоғары қосылған құнды кластерлерді дамыту (ресурстарды терең өңдеу, ауыр машина жасау, тыңайтқыштар және т.б.).
2. Шетелдік инвесторларды тарта отырып, Қазақстанның туристік әлеуетін дамыту.
3. Ауыл шаруашылығы секторын шикізаттық үлгіден өнімді өңдеуге көшіру.
4. Жаңа инвестициялық циклды іске қосып, инвестицияларды тартуға арналған толық экожүйе құру.
Форумда шетелдік инвесторларды тарту және қазақстандық бизнеспен өзара әрекеттесуді жеңілдетуге арналған International Business Connect цифрлық платформасы ерекше қызығушылық тудырды.
Форумның қарым-қатынастарды нығайтуы
Үрімшіде өткен форум өңіраралық ынтымақтастықтың маңыздылығын тағы да дәлелдеді. Қазақстан мен Қытай арасындағы серіктестік тек мемлекеттік жобалар аясында ғана емес, сондай-ақ бизнес-қоғамдастықтың белсенді қатысуымен де кеңеюде. Бұл контексте Қазақстанның шетелдік инвестицияларды тартуға және отандық бизнестің халықаралық аренадағы орнын нығайтуға бағытталған бастамалары ерекше атап өтілді.
Форумның соңында тараптар бірлескен жобаларды сәтті іске асыратынына сенім білдіріп, әртүрлі салаларда ынтымақтастықты жалғастыруға келісті.
Пікір қалдыру:
Пікірлер: